আহ্ ল পালনি -প্রিয়দর্শী চাকমা
চাঙমাগুনে আমি আহ্ ল পালনি পালন গরি,
বজর বজর যুগ যুগ পিত্তাপিত্তি আমল ধরি।
পালে এস্যোন এদিন্নো জাদর বুড়ো বুড়িয়ে,
সিত্তায় আমিও পালেই দিন্নো আগহুজিয়ে।
গরুগুনরে মাফ দিদঙ এগদিনত্তায় আলসুয়ানিত্তুন,
সেদিন্যা গরুগুনরে গাদেদঙ ছড়াত ফেলে মোরোঙত্তুন।
আহ্ ল পালনি এগদিন আগে জিদাজিত্যা গরি
লাঙল জুয়োল সাত্তানি ধোদঙ পরিস্কার গরি।
ঘরত আনি উদোনত রোদ হাবেদঙ
সিঙগোবা বেড়োদাগত আবুজে তদঙ।
মামা বুজি বেভেদাগী নুয় জুমত যেদাক
নানায়েক্কান শাকপাত তোগে আনিদাক।
আহ্ ল পালনি দিন্না শাক পাজন রানিদাক
আগা পাদাত পোই জুগলে মা লক্ষী মা'রে ভাত দিদাক।
রাজকীয় হলকর্ষণ উৎসব থাইল্যান্ডদূরত্তুন হায়ত্তুন গরবা গুরবি বলেদাক,
বুড়ো বুড়ি ডাগিনায় হুরোহাবি ভাত হাবেদাক।
হিয়ে হিয়ে হুরো হাবি ঘরছাবা গরিদাক,
ওঝা ডাগি আবদবলা ফিবলা হাদেদাক।
বৈদ্য ডাগি বেক্কুনে ছড়াত যেই মাদা ধোদাক,
মাদা ধোই পুরেলে বেক্কুনে ঘরত ফিরি এদাক।
গরবা গুরবি বলান্যারে মদে ভাঙে ভাত হাবেদাক,
হুরো ঠেঙানিলোই ওঝা মুরুব্বীগুনে চাম্বা চেদাক।
গেরোজসোর গিরিত্তি ওজোন্দী না লামন্দী অব হোই দিদাক,
ওজোন্দী ওবার অলে বেক্কুনে সারিবো হোই আজি উদিদাক।
বুড়ো বুড়ীয়ে ঘর ন ছাড়ন ঘরত্তুন তারা ন লামন
বিঝু দুক্যা গরি বুড়ো বুড়িয়ে দিন্নো গরন পালন।
ঈঙ্গলা পিঙ্গলা নাড়ী যা হাম তে গরের না ন গরের,
হাক্কে হাক্কে চেদাক তারা নাগর বৈয়ারান হুন্দী চলের।
আহ্ ল পালনি পালেলে দেব রাজেও হুজি অদঅ,
এগ সাপ্তা সঙ ঝড় দিদো আহ্ ল পালনি ডর ধরিদো।
মা পিত্তিমিই আজিদো হুজি ওইনায় তেয়ো নাজিদো,
জুমো ধান হেতহেত্তি দোল গরি য়েল ওইনায় ভরি উদিদো।
আহ্ ল পালনি
প্রিয়দর্শী চাকমা
পুরঃ ২১/০৬/২০২০ ইং।
Comments
Post a Comment